Estatuko lehen hidrogeno berdearen planta Amorebietan, Bizkaian, egongo da.
Egungo energia-sorkuntza zentral baten azpiegiturak eta estatu mailako gas banaketa sarea baliatuko dira. 2022an hasiko da martxan, 20 MW ekoizteko helburuarekin, nahiz eta 2030erako 200 MW sortzeko gai izatea nahi den.
Hidrogenoa (H₂) etorkizun hurbilerako energia itxaropentsuenetako bat da, bere errekuntzak ez duelako kutsatzen. Aireko oxigenoarekin konbinatzean, energia askatzen du eta lurrun ura baino ez du sortzen errekuntza-produktu gisa. Presio handiko gas modura edo likido modura gorde daiteke, edo dagoeneko dauden gas-instalazioen bidez banatu.
Hidrogeno berdearen garrantzia
Hidrogeno mota ezberdinak daude: hidrogeno grisa, urdina eta, iraultzailea dena, hidrogeno berdea, berriztagarria baita. Horregatik, Bizkaiarentzat horrelako proiektu handi bat izatea oso garrantzitsua da.
Sener, Nortegas, White Summit Capital, Castleton Commodities International (CCI) eta Bizkaia Energía dira proiektu hau bultzatzen ari diren enpresak, eta 2022rako guztiz martxan egotea espero da.
Planta Amorebieta-Boroan egongo da
Proiektuak 20 MW-eko gaitasuna izango duen hidrogeno berdearen planta bat garatuko du, Amorebieta-Boroako ziklo konbinatuko zentralaren (CCGT) egungo gas eta elektrizitate azpiegituretan. Helburua da urtero 1.500 tona hidrogeno berde sortzea %100 berriztagarriak diren iturrietatik, jatorri-ziurtagirien eta PPA (Power Purchase Agreement) berdeen bidez. Horrek urtean 12.000 tona CO₂ atmosferara igortzea saihestuko du.
Sortutako hidrogeno berdearen zati bat Bizkaia Energiaren gas bidezko CCGT plantan bertan erabiliko da, CO₂ emisioak murrizteko. Horrez gain, Nortegasen egungo banaketa-sarean injektatuko da, gas naturalarekin nahasita, gaur egungo energia kontsumoen zati bat deskarbonizatuz. Gainera, enplegua sortzeko iturri izango dela aurreikusten da Bizkaian.